गुल्मीको रुरु क्षेत्र बम्घामा घरमा पहिरो खस्यो, सुतिरहेका ४ को ज्यान गयो

ज्ञवा संचार । २०७७, साउन १७ । गुल्मीको रुरुक्षेत्र गाउँपालिका ५ बम्घामा रातीको समयमा घरमाथी पहिरो खस्दा एकै परिवारको ४ जनाको ज्यान गएको छ । 

रातको समयमा परिवारका सबै सदस्य सुतिरहेको समयमा अचानक पहिरो झरेर घर पुरिएकोले सो घटना हुन पुगेको बताईएको छ । 

वम्घाको दुर्गम बस्ती आँटेपाटामा ढुंगासहित खसेको पहिरोले राजु माझीको घर पुरेको हो । 

पहिरोमा उनकी श्रीमती विना माझी, अन्दाजी १०-१२ बर्ष उमेरका दुई छोरा सागर र हेमन्त र ४ वर्षीया छोरी विनिताको ज्यान गएको हो ।

दुर्गम बस्ती र रातको समयमा घटना घटेकोले समयमै उद्धार गर्न नसकेपनि अहिले रिडीबाट प्रहरी टोली र स्थानियहरु घटनास्थलमा पुगेको सो वडाका वडाध्यक्ष हरि ज्ञवालीले जानकारी गराएका छन् ।

उनले सो वडाका विभिन्न ठाऊँमा पहिरो झरेको र बाटोहरु पनि अवरुद्ध भएकोले घण्टौ पैदल हिडेरै उद्धारमा जुटिरहेको जानकारी गराएका छन् । घटनाबारे थप विवरण आउन बाँकी छ।