ज्ञवा संचार | रसुवा, भदौ १० । रसुवाको भोटेकोशी नदीमा बुधबार बिहान तिब्बततर्फबाट अचानक
आएको ठूलो बाढीले जिल्लाको उत्तरी क्षेत्रमा व्यापक क्षति पुर्याएको छ। बिहान
करिब ९ बजेतिर आएको बाढीले टिमुरे, रसुवागढी र स्याफ्रुबेँसी क्षेत्रका बजार,
सडक,
पुल,
सरकारी
संरचना तथा जलविद्युत् आयोजनामा क्षति पुर्याएको हो।
बाढीका कारण दर्जन बढी सुरक्षाकर्मी सम्पर्कविहीन रहेको पछिल्लो विवरण
सार्वजनिक भएको छ। उनीहरूको खोजी तथा उद्धारका लागि नेपाली सेना, नेपाल
प्रहरी र सशस्त्र प्रहरी बल परिचालन गरिएको छ। सरकारले उद्धार, खोजी
तथा राहत कार्यलाई उच्च प्राथमिकतामा राखेको जनाएको छ।
बाढीले रसुवागढी भन्सार कार्यालयको संरचनामा समेत ठूलो क्षति पुर्याएको
छ। भन्सार परिसरमा रहेका सवारीसाधन तथा अन्य संरचना बाढीले बगाएको बताइएको छ।
क्षतिको विस्तृत विवरण संकलन भइरहेको छ।
बाढीको प्रभाव रसुवामा मात्र सीमित नभई नुवाकोटतर्फ समेत पुगेको छ।
वेत्रावती, त्रिशूली र देवीघाट आसपासका क्षेत्रमा बाढीको असर देखिएको छ।
त्रिशूली नदी हुँदै पानीको बहाव तलतर्फ बढ्न सक्ने भन्दै धादिङ, चितवनलगायत
तटीय क्षेत्रलाई उच्च सतर्कता अपनाउन आग्रह गरिएको छ।
प्रारम्भिक विवरणअनुसार बाढी तिब्बततर्फबाट अचानक ठूलो मात्रामा पानी
भोटेकोशी नदीमा प्रवेश गरेपछि आएको हो। घटनाको वास्तविक कारण तथा पानीको स्रोतबारे
थप प्राविधिक अध्ययन भइरहेको छ।
बाढीले टिमुरे र स्याफ्रुबेँसी क्षेत्रका बजार तथा जलविद्युत्
आयोजनाका संरचनामा समेत क्षति पुर्याएको छ। क्षतिको यकिन विवरण संकलन गर्ने काम
भइरहेको छ।
यसैबीच प्रधानमन्त्री बालेन्द्र शाहको आह्वानमा विपद् जोखिम
न्यूनीकरण तथा व्यवस्थापन राष्ट्रिय परिषद्को आकस्मिक बैठक बसेको छ। बैठकले खोजी,
उद्धार,
राहत
तथा प्रभावित क्षेत्रमा आवश्यक समन्वयलाई तीव्रता दिने विषयमा छलफल गरेको छ।
सरकारले भोटेकोशी तथा त्रिशूली नदी आसपासका बासिन्दालाई विशेष
सावधानी अपनाउन, नदी किनारमा नजान र स्थानीय प्रशासन तथा सुरक्षा निकायको निर्देशन
पालना गर्न आग्रह गरेको छ।
पछिल्लो विवरणअनुसार बाढीबाट भएको मानवीय तथा भौतिक क्षतिको पूर्ण
विवरण अझै संकलनकै क्रममा रहेको छ। खोजी तथा उद्धार अभियान जारी रहेकाले क्षतिको
संख्या थप परिवर्तन हुन सक्ने अधिकारीहरूले बताएका छन्।